GAPSK 高級

仔仔考GAPSK 高級的成績出左了，我曾有一絲希望佢可能有卓越呢！結果考得優良，講真我有少少失望，不過這是仔仔的實力，當中有佢付出的努力和時間，所以我也替他考取此成績感到高興的。

回想起考GAPSK高級的過程真的一波三折，平時一直有上門的補習老師一星期和仔仔補一堂普通話的，原本諗住臨考前一兩個月，加堂補鐘，務求令仔仔可以係考試能有好成績。沒想到，老師因家中有事，不能替仔仔補普通話兩個多月，變相我要充當普通話老師。如果我普通話得，我就自己教喇，因為我普通話確實好爛，係好難教仔仔的。但考試當前，唯有頂硬上，我盡我所能和仔仔温習考試範圍，我好勤力的製作考試時需要的道具。最後仔仔考得優良，我覺得都算好好喇，無老師糾正錯音，得好媽幫手，都考到優良，而且考試時，仔仔只不過是剛4歲1個月多啲，考高級是越級挑戰呀，所以都算叻叻的了！

我是犀牛最終回

話說之前我好擔心肥B，因為肥B時常話自己係犀牛去到走火入魔的地步。最近這魔咒已解除了，基於兩個原因︰一、老師的幫助；二、係同仔仔玩時，用犀牛鬧佢做事懶散

一、老師的幫助
事緣肥B班主任因校內事情通知我，我就講了肥B的情況俾老師知道，說仔仔當左自己係真犀牛，話自己唔係人類，老師說幫我同仔仔講講，那星期後，我問仔仔你係犀牛還是人類呀？佢懂得答自己係人類。

二、俾犀牛玩具鬧同攻擊(只係玩既形式)
事緣肥B好懶散，叫佢做練習又唔做，叫佢温 温習紙又唔願温，我咪用佢鍾意的犀牛玩具扮聲話佢兩句，同佢講我們啲犀牛好勤力架，唔鍾意你咁懶散呀，然後攞佢隻犀牛撞佢。之後，過了一排，佢同我講，佢唔鍾意犀牛喇，要將犀牛玩具收埋。

第1次參加數學比賽

仔仔第1次考數學比賽，我原本諗住好簡單，試前只是做左兩本數學練習， 結果分數沒有70分以上，沒有任何獎項，我心想，不要緊，但仔仔究竟有多少分呢？

追問下主辦單位了解，原來仔仔有62分，我覺得仔仔都考得唔錯，第1次考試，要連續答20題數學題，對仔仔來說已是個挑戰，平時在家都只是做一兩功課，那有試過1次過做這麽多題。

而且要自己1人在陌生環境考試，有此成績，我和先生都好滿意，起碼知道仔仔有嘗試自己答問題。記得仔仔考試入場時是眼濕濕的，考試接他時是好開心的，因主辦單位在比賽完結時派每位小朋友1份禮物。

我是犀牛下集

仔仔已當左自己係犀牛，話自己係動物唔係人類，話自己姓犀，不是姓馮，不喜歡自己原本的姓氏。眼看好像好有童真般，作為媽咪是有些擔心的。
1）當發生不如意事時，他就會扭計說要4隻腳行路
2）當提及叫佢用手做事時，他會說自己無手，唔鍾意自己的手，也試過喊住說自己無手。
3）佢話自己係犀牛，問我佢隻犀牛角去左邊，喊住話要買邊隻角俾佢。
4）當正自己係犀牛，時時擺隻手係頭到扮係犀牛角，出街瞓覺一定擺犀牛陪自己。
5）砌lego必砌犀牛，作犀牛故事及好鍾意叫媽咪扮其他動物同佢玩同犀牛打架遊戲。
6）不喜歡圖書中的人類，不喜歡圖書中的小朋友，不認自己係小朋友，只認自己係小動物。
7）不喜歡人地叫佢中文全名，覺得個個讀錯佢的名，記得有次返大陸過關，過關人員問我仔仔叫什麼名字，我答過關人員仔仔中文全名，之後仔仔爆喊，話自己姓犀，喊足半小時。

真希望仔仔大些會有改變。

第一次考試GAPSK初級

對上星期日，帶仔仔去火炭駿景廣場考GAPSK普通話考試初級，考試12點半先開考，我同先生仔仔好早就做現場，本想著早些登記，原來排了一會才知不能預早登記的，我們12點三先開始登記，仔仔入到陌生的試場，口裡說著想我和先生陪他，但考試不能有家長陪同的，感恩的是仔仔沒有因我們離開而喊，我們說考試好快的，我們門口等你。仔仔考試，我都好緊張呀，因為有一些弱項，仔仔好多時都會出錯如向左轉、向右轉、舉起左手、舉起右手。仔仔考完出來，佢話佢識哂，努力左大半年，終於完成這個考試，所以未出成績，已答應買他一直想要的布動物公仔。

題外話，在排隊登記時，我留意到好多報考GAPSK的學生，好多都來自國際幼稚園、學之園，而學生本身是講流利普通話的也不少(因見其媽咪一開口說得一口流利普通話和孩子對話就知)，這些家人是普通話母語的學生，未考試已穩勝一大半了。而GAPSK初級的考生主要K2生會較多，而K1生都有，不過就比較少一些，所以我那時都感到俾K1的仔仔去考，都幾冒險下，要顧慮就事頗多如怕仔仔去陌生環境喊、唔肯聽陌生人指令、左右不分時出錯等…幸好，這些要沒有發生到。

做人家嫂真委屈

事緣係大前日，我和仔仔跟學校的温習紙温習，但仔仔懶散，不肯温習，講道理或哄都不願配合，奶奶見到，奶奶就開始對我發脾氣，將啲怨氣發係我度，老爺又接著俾說話我聽，一人一句說話攻擊我。

我真係真心覺得好委屈的，佢地話仔仔唔食肉係因為我俾壓力個仔搞到佢唔食肉喎…心諗，妖…之前阿仔學校停課加病假差不多成個月無返學，都無乜點温習喇！阿仔咪一樣唔願食肉，關我和仔仔温習什麼事呀？真係神經病，老屈我。

老爺又話我亂洗錢，買到成屋都係書，又漢字五百又什麼，攞去填田回收都無人要，又話另叻既人，屋企點會成屋書呀？大佬，我唔係駛老公錢，自己賺的錢買書給自己仔睇，有乜問題呀？我自己平時又無點買其他無謂野，又無點成日約人出街，一放工沒事就即回家，駛得幾多錢呀。

又話又唔係要入名校，咁辛苦做乜吖，話自己以前鄰舍個仔考到入名校又點吖，讀到傻左呀！我心諗攞啲極端例子嚟講做乜吖…阿仔温習學校温習紙唔配合，唔係俾依啲說話我聽吖嘛…神又係你，鬼又係你喇…記得之前老爺仲同我講，叫我唔好只看課外書，要温下學校書，到我跟返學校書温習，又話我俾壓力個仔。

又話阿仔星期一回來痾屎硬，話我無俾菜佢食，我有俾呀，我都控制唔到，又話我浪費啲食材，無用晒奶奶星期六日留俾我煮給仔仔食的餸，仔仔星期日去考試，出左街，無煮到，我都唔想的。

我都唔明，一啲咁少既事都可以話我，對住他們好大壓力囉…孩子是我一個人既咩？又唔見佢地話過仔一句。我點解要成你們的出氣袋呀？

肥B醒目左

今日和肥B睇圖書，和平常一樣，我伴讀給他聽，我只要求他跟我讀書的封面。8本書，他出奇地肯一口氣看完。更令我感到意外的是，肥B竟然主動提出朗讀圖書，書的內容，字數也不少的，他讀了很多字，這是驚喜，因為他原來懂得讀的字也不少的，不懂得讀的字，他也虛心主動請教我教他讀。

感覺上，3歲7個月的肥B開始成長了。

可怕的流感

全家人都俾乙型流感打敗了。事緣我先生係1月尾的星期六無啦啦發冷，接著的星期日就發燒，吃了幸福傷風素都退唔到燒，跟住就睇醫生，佢喉嚨痛又咳，都以為是普通感冒。

之前星期二的早上肥B發燒了，睇左醫生，都以為是普通感冒。想不到，星期三的晚上，肥B發高燒，迫近40度，而同一時間我先生都發燒成39度。全家人，心都荒了，怕肥B中甲型或乙型流感就弊，那時急住去夜診快速測試，上網查瑪麗醫院的話可能要等成8小時，打去私家醫院又沒人聽。那時我向幼稚園whatsapp group發問哪裡有快速測試，最後得知康柏置樂有，幸好趕得切晚上十點半前到，肥B做測試，沒有中甲乙流感，全家鬆一口氣，先生因退燒就沒有做測試。

星期四下午，我發覺全身沾寒沾凍，玩夜晚仲發燒，成晚著好多衫都發冷好凍，我問我先生俾消炎同退燒藥我食，星期五就沒事照常返工，但就keep住食消炎藥，但去到夜晚，整晚我都沾寒沾凍，仲發埋燒。星期六早上都有沾寒沾凍，又喉嚨痛，但温度計壞了，就不肯定有沒有發燒，我就睇醫生。醫生說你發左幾日燒有可能中流感，建議我做測試，那時我38度幾，我以為低燒唔會中，而之前肥B驗左都唔中，就應該唔中，醫生說可能其他人傳俾你都未定，最後我做測試，中左乙型流感，醫生開了5日假俾我，和開特敏福我食。

將我中流感的事話左俾先生後，老爺都發燒，老爺都做測試，又是中左乙型流感的，當時又見肥B燒左幾日，明明退左燒，又會重新發燒，見唔對路，時間夜，就去了新都康柏做測試，肥B都是中左乙型流感，都要食特敏福，奶奶都唔舒服，但奶奶他已睇中醫就沒有特別做測試了。

這次流感把全家人都折騰一番，真係怕怕了。

我不食肉下集

之前我以為哄肥B食肉成功，點知都是失敗。肥B的心結是唔鍾意食肉是怕食肉會涉牙隙，已解釋好多次，說若真的涉牙隙，爸爸媽媽嫲嫲都會幫你，但佢依然口說「肉唔好食，會涉到的。」這句重覆十幾廿次。

肥B不吃肉，令嫲嫲日日心煩，我和先生都擔心肥B長期唔食肉會營養不良。上星期六，我帶肥B去圖書館，當中我看到一本書是講不偏食的，故事主要是講松鼠媽媽告訴松鼠仔仔，若偏食會無營養，照鏡時就見到將來的自己變成瘦削的怪獸。

肥B睇完這本書後，肯再次食返肉，圖書的魔力勝我講10萬次。

我不吃肉

肥B最近不肯吃肉，什麼肉都不肯吃，單單吃蔬果，全家都為了他這個問題困擾著，怕他長期吃素會沒有營養，影響吸收和成長。他已不肯吃肉兩三個星期了，若想混合肉碎給他吃以途瞞天過海，他的金舌總有辦法把微細的肉碎吐出來。

我們也嘗試過給他吃香口美味的肉如麥樂雞、火腿、午餐肉、豬柳等，起初他肯嘗試，但他試過以後，他就不想再試了，怎麼辦呢？法寶用盡。

後來，奶奶終於估中肥B不肯吃用的原因，原來他好怕吃肉後，肉碎涉牙隙，涉牙隙，他寧願不吃。

昨晚，想到一個方法，終於改變到他踏出第一步，我告訴他，給你吃的是雞上脾，是全隻雞最滑最香的地方，好易咬，唔會涉牙，他終於重拾吃肉的滋味。

我不知道這方法能有效多久，我們只想他飲食均衡，健健康康吧了！

情緒失控

昨日肥B瞓覺，半夜突然喊醒，把全家驚動了，喊到收不到聲。肥B最喜歡嫲嫲，嫲嫲叫佢唔好喊喇，肥B就喊得更大聲，問佢乜事，佢就喊到講唔到，接住嫲嫲見哄不掂佢，就以為佢唔想瞓，推俾我(媽咪)去哄佢 (我心想肥B最鍾意既嫲嫲都哄唔掂，我點會哄得掂佢。)肥B見嫲嫲推俾我，以為嫲嫲唔想抱佢哄佢，喊得更加厲害，又踢腳，又說唔鍾意依度。嫲嫲就跟我說，佢最近瞓覺磨牙，聽人說是壓力大，你和阿斌(爸爸)係咪之前鬧過佢嚟呀？我們異口同聲話，無鬧過佢。老爺加把口說，你聽到喇，阿B話唔鍾意依度(屯門)，之前係香港仔(老爺奶奶住的地方)住時，阿B同老爺奶奶講爸爸媽媽最惡，排鍾意程度最尾。嫲嫲見哄不掂肥B，就發晦氣俾肥B聽，話我唔識湊你喇，我返香港仔喇…肥B當然喊到拆天了。肥B喊多一輪，累了，接著又瞓返，瞓得好好，起身時像失憶般，對昨晚大喊的事隻字不提，心情很愉快。

昨晚肥B大喊，我同先生都瞓唔著，我們估計，明天要開始返學，可能係壓力，發惡夢，夢見俾人鬧，狂喊都唔出奇，以前肥B喊，我們用轉易法或哄他就令佢收聲唔喊，而家這些方法唔得了，始終唔同細個時，而家已3歲半，阿B由細到大，爺爺嫲嫲一見到肥B喊就即刻哄，又唔俾話肥B，又話唔好由佢喊，而家死火喇，唔識自己控制自己收聲。因為沒有機會俾肥B學習控制自己的情緒，我和先生都一致認為，應該任由肥B喊，喊到開始唔喊時才安撫，才會學懂控制情緒的。可惜這些道理，老爺奶奶唔明白，他們只會話我們搞喊阿B(若阿B無做唔岩的事，係唔會無啦啦話佢，而肥B係唔話的，因為由細到大老爺奶奶一見佢喊就就晒佢，佢想點就點，唔會俾佢喊)，老爺奶奶縱容肥B，而家肥B唔識控制情緒，他們只會責怪我和先生唔識教，而不會反醒自己的問題。唉…

被低估的能力

每週阿仔學校都會有張温習紙，之前我的做法是會將學校要求的認字製作成字卡，以便同阿仔温習。每週都製作字卡又過膠都幾費時的，後來我發現不用字卡也行，節省不少時間，直接將温習紙同小朋友温習就行，字雖小，但要認字，小朋友有心認是認到沒問題的。之前將字放大，以為字小，小朋友不會認，真的低估阿仔。

利申：阿仔都係非自願温習，都是零食哄哄，才就範。對温習是學生份內事零觀念。

我不要長大

阿仔返學已有接近三個月了，但每天返學前都會嘈著不想返學。起初，我以為是適應問題，但都三個月了，故我相信是他不想長大有關。

學校10月份有一個主題是猴子長大了，那時阿仔自稱一歲，話自己仲好細個，要人抱，要人餵，話自己唔係三歲。在學校會要求小朋友學自理，阿仔由於爺爺嫲嫲照顧開，飯來張口，吃飯要人餵的，故在學校要求他做這做那，他就不想做了，因為懶開有條路，現在要求他自己吃餵，只會自己吃幾口就放棄要求嫲嫲繼續餵，只有最愛吃的水果才會妥協，肯自己吃不用餵。

對於阿仔不想長大的問題，我是有些感觸的，一方面我覺得阿仔不想長大，覺得自己仲好細，仲係BB依個想法好可愛，另一方面，是想阿仔面對長大，不再是BB依個問題，參考其他媽咪的建議，同阿仔分析下1歲BB同3歲BB的分別，我同佢講「你好想去長隆野生動物園，之前爸爸答應你，4歲就會帶你去，如果你而家得1歲，那你要等多3年了，若你是3歲，下年就可以去了。」另外也和他說「若你得1歲，只係得奶飲，你鍾意食的果撻呀，餅乾呀，朱古力奶，啫喱都無得食，因為太細個，唔食得依啲野，若你3歲就唔同了，因為大個了，好多野都可以食得了。」

經過一番分析後，他接受自己3歲的事實，也不話自己1歲，可見他識分析邊樣有著數，蠢唔晒。

將死復活的黃時鐘

阿仔學校實行一人一花計劃，學校派給學生的花種是黃時鐘，給小朋友種花的目的是想培養小朋友的責任心。未種黃時鐘之前，我也想培養阿仔責任心，在家種植櫻桃蘿蔔，阿仔的責任心就培養唔到了，一句話「我唔想有責任心」就打發左我，最後變相變左我種，但全家反對我在家裡種，他們日娥夜餓，說什麼會惹蚊滋，勸我把櫻桃蘿蔔盆栽掉掉，那時由9月開始種，堅持到11月，最後我不想為了一盆盆栽而影響家中的和諧，只有自己堅持，而同老爺奶奶起衝突，感覺不太值得，就掉了櫻桃蘿蔔盆栽了。

命運是這麽作弄人，剛掉了櫻桃蘿蔔盆栽數天，阿仔就係學校帶盆黃時鐘回家。你說好笑不好笑，黃時鐘回家，當然沒有人反對在家種植喇，因為要養一排到下年1月中交差攞返種植成果返學校。真的差別對待，我自己發起的種植計劃被否決，卻由阿仔學校發起，受全家高度關注其成長情況。

黃時鐘星期一至五由老爺負責照顧，督導阿仔淋水，而我就負責星期六日。黃時鐘起初在家灑陽光，老爺覺得黃時鐘唔係好曬得，葉子好幾塊灑傷，變相在室內種，沒有曬陽光了。可是，隨著日子一天一天過去，黃時鐘不單沒有起息，葉子一塊一塊掉落，死氣沉沉。

我見黃時鐘就快死，就請教幼稚園group的人尋求養植正確方法，原來黃時鐘好鍾意曬太陽的，每天起碼曬8小時，還要每天淋水，每次20ml左右，經過一星期的救亡行動，黃時鐘終於有起息了，生出小葉來。

種植要識得其法，植物亂種真好易死，今次幸得高人指點，拯救黃時鐘，阿仔又可以繼續學責任心（暫時阿仔對待植物的責任心不強，不上心，不知幾時才感化到他呢？）。

學普通話回憶錄

本身我自己的普通話好爛，所以男家那邊提我唔好我教普通話，怕我會教錯阿仔。基於知道阿仔幼稚園K1時會有普通話課，為了令他易些適應，係今年2月尾時，開始請普通話老師上門教兒子，一星期一堂。

記得第一堂普通話那時阿仔2歲8個月左右，阿仔對普通話極度討厭，可能是因為接觸得少，佢對自己唔熟悉的語言好有挫敗感，因為教了，很快又忘記，不懂得怎樣讀。

那時他又坐唔定，為了令他有些興趣，就從他喜歡的動物入手，但堂堂都是動物，我就開始懷疑自己有沒有行錯一步呢？為何仔仔普通話還是沒什麼進步，不過我還想繼續試下去。經過五六堂都是學動物後，開始學一些食物生字的普通話，接著就開始用貼紙書吸引他上堂時專心些，在貼貼紙的過程中學動物、水果及汽車的生字。那時的他，已有些少進步，起碼肯坐定定一些，以前的他，學一會就不知往哪裡逃跑，叫嚷一番說不想學普通話。在令他上堂專心，我也有加些獎勵要素，如肯坐定定讀，有水果或餅乾吃。

接著，開始加入少量有關GASPK的試題，他都肯配合一下。直到KI開學不久，有關GASPK的試題也接著增多，接近一半時間是温習GASPK的試題，四分一時間温習校內普通話及四分一時間是貼紙書。自從開學之後，他對普通話的接受程度比以往好，可以講一點普通話句子了，以往的四五個月都是說重覆又重覆的動物及水果。可見堅持是有果效的，在阿仔討厭普通話及停步不前時，我也有一股衝動想停了此補習。

而家踏入12月份，阿仔的專心程度及配合度也比以往好，能回答到更多的普通話句子 (雖然現階段，有些音讀得不太準確，肯放膽說已是一大進步) 現在每星期一小時的普通話課已集中温習校內普通話書及GASPK。而阿仔對普通話已由討厭變得不太討厭，這可能是他熟了些普通話，他的信心開始建立的關係。

另外我一直沒有給阿仔學普通話拼音的，最近我認真看看學校的普通話課要求，原來學校的普通話課本雖然沒有拼音，但學校原來是有教的。所以基於這點，我就和阿仔温習返學校教的4個拼音，學校一個主題教1個拼音，我用了淘寶的拼音學習機，阿仔好鍾意呀！這真是意料之外。


淘寶的拼音學習機網址︰

https://item.taobao.com/item.htm?spm=a1z09.2.0.0.2a50b90aMGRPpq&id=532750707358&_u=11t8njj40686

人細鬼大

肥B一直都唔鍾意返學，每次返學回來，我間中有問他，「今日係學校學左咩呀？有無識到朋友仔呀？你朋友仔叫乜名呀？」他次次回來都話唔知。

最近有些突破了，學校旅行的名單出，有班內學生的名字，再加上之前校內活動的全班每組相片，我便朗讀一次阿仔班有去校內旅行的學生名字，就勾起對班內同學的印象了，能夠在相中指出誰是誰。原來阿仔都識得唔少自己同學，只是他平時唔記得同學名字，他自己組的同學名字都記得4個，只是一個唔記得，算不錯了。在組內，有一位小女孩劉同學，他特別喜歡，想不到3歲的他已有喜歡的女孩子，知道這女孩的名子及組內的同學名字後，我都有問這些同學在他心中的位置是點的呢？阿仔排劉同學第一，另一位女同學第二，其他男同學就後面。我知道阿仔好鍾意爺爺嫲嫲的，若這女孩和爺爺嫲嫲排次序，阿仔都是排這女孩第一位，可見這女孩的重要性。

昨天我問阿仔今日係學校做乜呀？佢話佢同劉同學一齊飛，飛去非洲。接著就話佢地一齊騎獅子又話一齊被困在獅子龍入面。我問你個男仔同學陸同學有無得一齊去無非洲呀？佢話，佢無得去，陸同學飛左去宇宙。

認字

肥B 3歲了，我就開始實行認字計劃，之前肥B兩歲半時，都有掛牆字卡俾佢認，但很快就忘記了，而看書就只看圖，沒有認真看字。

參考其他媽咪的做法，認讀是有竅門的。圖書書是分兩種，一種是認字書，而另一種是休閒書，認字書是一版一句，是阿仔讀俾我聽的，而休閒書是字細及一版數句，這是由我伴讀。

認字方法是認讀書是每天讀同一本書1次，每天都讀，配合字卡或生字表，直到自己識讀晒就開始轉新書，通常9至10天就會自己識讀。這個方法實行過是可行的，真的認到字。

中文認讀書，我用青田出版社……我自己會讀系列，而英文認字書就睇oxford reading tree level 1 and 2

温習温習

肥B開學不久，老爺和我說要同肥B温習校內書本，歌詞，那時我不太緊張，因為我有根據校內每週温習紙，製作有關字卡，每星期看一次課文及睇一次字卡，我以為這就足夠，而且用字卡問肥B,佢大部分都識讀，可見佢有聽老師上堂。

過了一個月多，學校派回對上一個主題的評估報告，我見仔仔在唱歌方面未能達到學校的要求，我估是因為我平時沒有和他練校內的歌有關。故10月中就開始跟好些唱歌部分，和仔仔每天唱一次，日子有功，在11月中派的評估報告，進步了1分，有3分，這是一個好開始。但11月的評估也顯示出他在中文用句方面退步了，這因為用句方面要求高，而我和他又温得少，原來1星期温1次是不夠。知道學校的要求後，我就每天抽些小時間和他温一温校內温習紙，不知道12月派報告時，會否有所進步呢？

我叫犀牛

阿仔由2歲左右懂得說話時，他已表明唔鍾意自己的名字，那時只接受人地叫佢動物名如TIGER或LION。到了現在3歲4個月大，他還是不喜歡別人叫佢的名字，說自己不是叫俊彥或Anthony，說自己沒有名字是動物來的。

問他為什麼不喜歡自己名字，但他又講不出原因

今次他說自己是犀牛，那我便對阿仔說動物都有自己的名字，那你叫Rhino Anthony可以嗎？對這稱呼，他就沒有反感。對於認同自己的名字，於他來說，是一種進步吧？